សៀមរាប៖ គម្រោងដោះលែងសត្វព្រៃក្នុងឧទ្យានអង្គរ ក្រោមកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance  បានដឹកជញ្ជូនសត្វសំពោចក្រអូបមួយគូ នៅថ្ងៃទី៧ ខែកក្កដា ឆ្នាំ២០២៣ គ្រោងនឹងដោះលែងចូលទៅក្នុងព្រៃធម្មជាតិនៃឧទ្យានអង្គរនៅ។

អាជ្ញាធរជាតិអប្សរាបានឱ្យដឹងថា សត្វសំពោចក្រអូប (Common palm civets) មួយគូ (ញី១ និងឈ្មោល១) ពីមជ្ឈមណ្ឌលសង្រ្គោះសត្វព្រៃភ្នំតាម៉ៅ បានយកមកផ្សាំងក្នុងទ្រុង ដែលក្រុមការងារគម្រោងនឹងដោះលែងចូលទៅក្នុងព្រៃធម្មជាតិនៃឧទ្យានអង្គរនៅពេលខាងមុខ។

កន្លងមកគម្រោងទទួលបានជោគជ័យក្នុងការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ (Pileated gibbon) ចំនួន ១៥ក្បាល ដែលកើតកូនបានចំនួន ៧ក្បាល សត្វឈ្លូស (Red muntjac) ចំនួន ៦ក្បាល សត្វស្វាព្រាម (Silvered langurs) ចំនួន ១២ក្បាល សត្វសំពោចក្រអូប(Common palm civets) ចំនួន ៥ក្បាល សត្វភេខ្លួនរលោង (Smooth-coated otter) ចំនួន ៨ក្បាល (កើតកូនបានចំនួន ៥ក្បាល) សត្វឆ្មារដា វ(Leopard Cat) ចំនួន ២ក្បាល កេងកងតូច (Oriental Pied Hornbill) ចំនួន ៧ក្បាល កេងកងធំ (Great Hornbill) ចំនួន ៦ក្បាល ព្វាំង (Wreathed Hornbill) ចំនួន ៧ក្បាល សត្វក្ងោក (Peafowl) ចំនួន ៩ក្បាល សត្វអន្សង (Common Water Monitor) ចំនួន ១ក្បាល និងសត្វផ្សេងៗមួយចំនួនទៀត ដែលមកដល់ឥឡូវសត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ។

អាជ្ញាធរជាតិអប្សរា និងគម្រោងដោះលែងសត្វព្រៃក្នុងឧទ្យានអង្គរបញ្ជាក់ថា អំពាវនាវដល់សាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា បញ្ឈប់ការដាក់អន្ទាក់សត្វគ្រប់ប្រភេទ និងមេត្តាកុំផ្តល់ចំណីឲ្យសត្វទាំងនោះ ដើម្បីឲ្យសត្វព្រៃទាំងអស់បន្តវត្តមាននៅក្នុងព្រៃធម្មជាតិនៃឧទ្យានអង្គរ និងបង្កើនចំនួនបន្ថែមទៀត៕